Хариуцлагын шинэ тогтолцоо
Монгол Улсын Ерөнхийлөгч У.Хүрэлсүхийн санаачлан боловсруулсан Монгол Улсын Их Хурлын тухай хуульд нэмэлт, өөрчлөлт оруулах тухай хуулийн төслийг https://d.parliament.mn/tusul/bf0c6b06-7eec-4ddf-b6f5-7b91476d762b
Ерөнхийлөгчийн Тамгын газрын дарга А.Үйлстөгөлдөр УИХ-ын дарга Н.Учралд албан ёсоор өргөн барив.
Энэхүү хуулийн төсөл нь парламентын гишүүдийн ёс зүй, хариуцлагыг чангатгах, сонгогчдын итгэлийг хамгаалахад чиглэсэн хэд хэдэн томоохон өөрчлөлтийг багтаажээ.
1. Гишүүнийг эгүүлэн татах үндэслэлүүд
Хуулийн төсөлд УИХ-ын гишүүнийг дараах тохиолдолд эгүүлэн татах зохицуулалтыг шинээр тусгасан байна:
- Тангараг няцах: Өргөсөн тангаргаасаа няцсан тохиолдолд.
- Ёс зүйн зөрчил: Гишүүний ёс зүйн дүрмийг ноцтой болон удаа дараа зөрчсөн.
- Гэмт хэрэг: Гэмт хэрэг үйлдсэн нь шүүхийн эцсийн шийдвэрээр тогтоогдсон.
Эдгээр асуудлыг УИХ-ын Ёс зүйн дэд хороо болон нэгдсэн чуулганаар заавал нээлттэй хэлэлцэж, Үндсэн хуулийн Цэцийн шийдвэрээр эцэслэн шийдвэрлэхээр заажээ.
2. Ирц ба санал хураалтын босго
Парламентын үйл ажиллагааны идэвхийг нэмэгдүүлэх зорилгоор гишүүдийн ажилд хандах хандлагад тодорхой шалгуур тавьж байна:
- Ээлжит чуулганы хуралдааны ирц 70%-иас доошгүй байх.
- Чуулганы санал хураалтад биечлэн оролцсон хувь 70%-иас доошгүй байх.
3. Ёс зүйн хэм хэмжээг хуульчлав
Монгол Улсын Их Хурлын тухай хуулийн 7 дугаар зүйлийн 7.2 дахь хэсэгт нэмэлт оруулж, гишүүний үндсэн үүрэгт “ёс зүйн хэм хэмжээг чандлан сахиж” ажиллах шаардлагыг тусгайлан зааж өглөө. Энэ нь гишүүд зөвхөн ашиг сонирхлын зөрчлөөс ангид байхаас гадна, ёс суртахууны хувьд өндөр хариуцлага хүлээх эрх зүйн орчныг бүрдүүлж байна.
