Улаанбаатар хотын хүнсний томоохон зах, худалдааны төвүүдэд махны үнэ өмнөх саруудтай харьцуулахад буурч эхэлжээ. Малын тарга хүч сайжирч, зах зээлд нийлүүлэх махны хэмжээ нэмэгдсэн нь үнийн бууралтад нөлөөлсөн байна.
Худалдаачдын мэдээлснээр үхэр, хонь, ямааны махны нийлүүлэлт нэмэгдэж, иргэдийн худалдан авалт тогтвортой байгаа аж. Үүний зэрэгцээ хөдөө орон нутгаас нийслэл рүү тээвэрлэгдэх махны хэмжээ өссөнөөр зах зээл дэх нийлүүлэлт сайжирчээ.
Зарим худалдааны төвүүдэд үхрийн ястай мах килограмм тутамдаа өмнөх үеэс хэдэн мянган төгрөгөөр хямдарсан бол хонины махны үнэ мөн адил буурах хандлага ажиглагдаж байна.
Харин жижиглэн худалдааны цэгүүдэд үнийн өөрчлөлт харьцангуй бага байгаа ч цаашид тогтвортой буурах төлөвтэй байгааг худалдаачид онцоллоо.
